Aktuelles

Samichlous, du liebe Maa .....

Samichlous, du liebe Maa .....

13.12.2017

Äs Stimmigsbild vom 6. Dezämber

Öppe 150 Chind vo Chindergarte u Unterstufe vom Dorf hei am 6. Dezämber i zwone Gruppe bim Allmidhölzli dr Samichlous gfunde.

Eseli, Eseli, hoppsassa, zieh em Chlous dr Schlitte na.

Nei weisch, uf dr Strass het’s jitz z weni Schnee, das wär viu z sträng gsy für e Bimbo, drum hei mir dr Schlitte deheime gla.

Louf im Trab dür ds Dörfli y, mit em liebe Chlous drby.

I bi froh, han i o geng dr Schmutzli u di vile Tier vom Wald, Eichhörnli, Füchs, Häsli u Vögel, wo mir ds ganze Jahr dür hälfe. Si chöme albe zum Schuelhuus cho luege, was dir Chind so machet. Was si mir verzelle, das schrib i immer i mis dicke Buech da.

Eseli, Eseli, hoppsassa, hesch dis Mässli Haber gha?

Dr Bimbo isst gärn, lueget, o jitz findet är hie no Gras u Chrüttli, drum het är o ganz es weichs, fiins Fäll.  Är weiss o, dass es hie i mim Sack e Huufe feini Sache für öich alli het.

Gäu, du hesch ä strängi Zyt, u dr Wäg isch läng u wyt.

Mir drü, mir si gärn zu öich cho, dä Wäg hei mir gärn unger üsi Füess gno. Mir hei fescht Fröid gha a öine Värsli! Blibet wyterhin so fridlech zäme uf öijem schöne Pouseplatz u lueget, dass dä schön suber blibt. Häbet’s guet, mir fröije-n-üs, öich nächtschts Jahr wieder z gseh.